![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Fá la detlaraziun de portignënza al grup linguistich
La detlaraziun de portignënza al grup linguistich é preodüda dala normativa dla Provinzia autonoma de Balsan.
Chësta detlaraziun é indespensabla por rajuns desvalies, sciöche por damané do contribuc y alisiraziuns provinziales, tó pert a concursc publics o surantó n'inciaria publica.
La detlaraziun de portignënza al grup linguistich é tosc fata. Al tleca mëte na crusc, sotescrí le formular y al é fat.
Che pó pa fá la detlaraziun?
Dötes les porsones che á complí 18 agn y che n'á nia ciamó fat na detlaraziun de portignënza o agregaziun a n grup linguistich pó fá la detlaraziun.
Les porsones che á la residënza tl Südtirol ciafa de regola na comunicaziun dal Comun de residënza püch denant co complí i 18 agn.
Ciodí pa sëgn?
Sce i ëis complí 18 agn arëise bonamënter ciafé n invit da Osc Comun da detlaré Osta portignënza linguistica. Sce I fajëis la detlaraziun te n ann da canche I ëis ciafé chësta lëtra, velera da atira. Sce I la fajëis dedô messëise aspeté n ann y mez denant che ara veles.
Sce I n'ëis nia ciafé la lëtra dal Comun, podëise impó fá la detlaraziun. I podëis contaté le Tribunal de Balsan o l'Ofize dl Vicar de pesc competënt y fá ci che é scrit sön chësta plata.
Co mësson pa fá?
Al tleca jí tl Tribunal de Balsan o tl Ofize dl Vicar de pesc competënt cun n documënt d'identité (tolesse para la lëtra d’invit sce I l‘ëis ciafada da Osc Comun).
Fá fora n termin:
Por fá la detlaraziun pro le Tribunal de Balsan vál debojëgn da damané do n termin tres la plata web aposta dl Tribunal.
Pro i Ofizi dl Vicar de pesc pó les modalités mudé: pro le Vicar de pesc de Balsan vál debojëgn da damané do n termin; pro i atri Ofizi dl Vicar de pesc, sciöche por ejëmpl Bornech y Sterzing, vára de regola da se presenté zënza termin; por i apuntamënc dla sabeda adoron tres n termin.
Al vëgn aconsié da controlé danfora les modalités preodüdes dal ofize competënt.
Metede averda! Al momënt pó ma les zitadines y i zitadins talians fá la detlaraziun pro i Ofizi dl Vicar de pesc.
Ultimo ajornamënt: 19/10/2026